ဤစစ်တမ်းတွင် နိုင်ငံ့အရေးပါဝင်ဆောင်ရွက်နေကြသူများအနေဖြင့် လက်ရှိ နိုင်ငံအတွင်းဖြစ်ပွားနေသည့် နိုင်ငံရေးအကြပ်အတည်းနှင့် ပဋိပက္ခဖြေရှင်းရာတွင် သံဃာတော်များ၏ ဦးဆောင်မှုနှင့် အားပေးကူညီမှုရယူရာတွင် အထောက်အကူဖြစ်စေမည့် လူ့အဖွဲ့အစည်းအတွင်းရင်ဆိုင်နေရသည့် ပြဿနာများ၊ ဗုဒ္ဓဘာသာနှင့် သံဃာထုများရင်ဆိုင်နေရသည့် စိန်ခေါ်မှုများ စသည့် အကြောင်းအရာများကို အလေးပေး လျှောက်ထားမေးမြန်းခဲ့ပါသည်။ အဓိကအားဖြင့် နည်းပညာများတိုးတက်ဖွံ့ဖြိုးလာသည့် မျက်မှောက်လူ့အဖွဲ့အစည်းနှင့် ယင်းတိုးတက်မှု၏ သက်ရောက်မှုအပေါ် ၎င်းတို့ ရှုမြင်သုံးသပ်ပုံ၊ ဒီမိုကရေစီတန်ဖိုးအပေါ်အမြင်၊ အာဏာသိမ်းမှုအလွန် ပဋိပက္ခများနှင့် လက်ရှိနိုင်ငံရေးခေါင်းဆောင်တို့အပေါ် ထားရှိသည့် သဘောထားအမြင် စသည်တို့နှင့် ပတ်သက်၍ လျှောက်ထားမေးမြန်းခဲ့ပါသည်။
